Bruken av tiazid har auka

Dette viser ei undersøking Nasjonalt kunnskapssenter for helsetenesta har gjort, der ein har sett på kor mange som fekk tiazidpreparat blant pasientar som starta med blodtrykkssenkjande behandling, og om dette endra seg over tid.

Vedtaket frå 2004 innebar at legane skulle føreskrive tiazid som førsteval ved høgt blodtrykk utan komplikasjonar (tiazidregelen). Kunnskapssenteret har vurdert effekten av tiltaket gjennom å samanlikne legane sine føreskrivingar før og etter regelen tok til å gjelde.

Fleire målingar
Analysen tek utgangspunkt i repeterte målingar av talet på tiazid-føreskrivingar i 11 månader før tiazidregelen tok til å gjelde og 11 månader etter. Datagrunnlaget er henta frå journalsystema til 61 legekontor i Oslo-området.

Fann ikkje negative verknader
Undersøkinga viser ikkje negative verknader av vedtaket. Talet på pasientar som nådde anbefalt behandlingsmål endra seg ikkje, og det var heller ingen klar endring i talet på pasientar som bytta preparat eller hadde behov for tilleggsmedikasjon.

Undersøkinga inneheld ein enkel økonomisk analyse. Den viser at tiazidregelen førte til innsparingar på 8 millionar kroner i løpet av det første året, på landsbasis.

Det er Helse- og omsorgsdepartementet som har bede om evalueringa.