Vil jamføre helsetenestestekvaliteten i Norden

VIL JAMFØRE NORDISKE PASIENTRØYNSLER: Marit Sissel Kise, Ritva Teräväinen, Ingeborg Strømseng Sjetne, Birgitta Edström, Jan Simonsen og Øyvind Andresen Bjertnæs

Enklare
Målet med det nordiske prosjektet er å utvikle målemetodar og presentasjonsformer som gjer det enklare å vurdere og jamføre kvaliteten på ulike helsetenester mellom dei nordiske landa, såkalla ”benchmarking”.

Det er tidlegare konstatert at det trengst å satse meir for å styrke datakvaliteten og få fram valide kvalitetsindikatorar til å gjere rettvise jamføringar mellom helsetenestene i Norden. Derfor har Nordisk ministerråd sett i gong eit omfattande prosjekt for å kunne gjere slike jamføringar mogleg i framtida.

Gullstandard
I Kunnskapssenteret møttest nyleg den nordiske arbeidsgruppa som skal lage felles kvalitetsindikatorar for pasientrøynsler.

- Den største utfordringa når det gjeld pasientrøynsler er å sikre naudsynt infrastruktur i alle landa for å gjennomføre store nasjonale undersøkingar, seier forskar Øyvind Andresen Bjertnæs. Han er leiar for arbeidsgruppa.

- Noreg har på ein måte gullstandarden når det gjeld landsdekkande målingar av pasientrøynsler. Vi har eit nasjonalt kompetansemiljø som arbeider både med undersøkingar ved somatiske sjukehus og institusjonar i psykisk helsevern, vi har eit system for å samle inn data frå faktiske pasientar og vi har praktiske røynsler. Det tek fleire år å byggje opp den slags kapasitet og dei tekniske og praktiske løysingane, seier han.

Vil måle fleire tenester
I prosjektet har dei arbeidd med eit nytt spørjeskjema, kalla Norpeq, som skal måle dei vaksne pasientane sine røynsler med døgntenester ved somatiske sjukehus i Norden.

Arbeidsgruppa vurderer no om heile eller delar av dette spørjeskjemaet kan brukast i fleire spesialisthelsetenester, som somatisk poliklinikk og døgnbasert og poliklinisk psykiatri, slik Nordisk ministerråd ønskjer.

Eit alternativ gruppa har drøfta, er å tenkje seg eit generisk spørjeskjema med nokre få kjernespørsmål som passar for fleire pasientgrupper. Eit slikt skjema er Kunnskapssenteret no i gong med å utvikle og teste for Helse Vest RHF (sjå lenke til prosjektplanen i høgre marg). Data frå testen skal vere klåre for analyse i januar neste år.

Del av større prosjekt
Denne arbeidsgruppa er altså ei av mange grupper som Nordisk ministerråd har sett i gong for å førebu jamføring av kvaliteten på helsetenester i Norden .

Dei andre gruppene arbeider med indikatorar for kvalitet innan pasientsikkerheit, tannhelsetenester og spesifikke og generiske sjukdommar.

Årleg
Det er planlagt at sluttrapporten skal kome rundt neste årsskifte.

Det videre opplegget er at  publikasjonen NOMESKO, som kjem ut med nordisk helsestatistikk kvart år, skal innehalde data om dei fellesnordiske kvalitetsindikatorane. (Lenke til NOMESCO i høgre marg.)

Kontaktpersonar ved Kunnskapssenteret
For pasientrøynsler: Øystein Andresen Bjertnæs
For heile prosjektet: Geir Bukholm